Sa Waiting Shed
Sinong inaantay mo? Sino ang dadating? Naabutan kasi kitang baluktot sa mahimbing na pagkatulog. Di mo yata napansin na pinagpiyestahan ka na ng lamok at ng mga sasakyang bumulusok ng usok sa umagang animo’y tuldok dahil ikaw na mismo ang nagpahiwatig na walang kasunod. Ngunit kung walang kasunod, bakit ka pa nag-aantay dito? May magbibigay ba ng saplot sa iyong balat na dinumihan ng traydor na pag-asa?
Hindi mo dapat kinakaibigan ang sementong higaan. At wag mong sabihin na itong munting bubungan ang magsasabing ang bukas ay walang hanggan. Di matitinag, di magigiba, di mauubos ang usok at lamok. Dadaanan at dadaanan ka nila.
